Rubriek Stamtäöfelke: Tieër-aovendj van kaartklup Aovert

Print
Rubriek Stamtäöfelke: Tieër-aovendj van kaartklup Aovert

‘Kaartklup Aovert van Baks Zjaak’. Afbeelding: Archief Frits Weerts

Laar / Weert / Altweerterheide / Stramproy / Tungelroy / Swartbroek -

Na uitgave van het boek ‘Stamtafel Weert’ zijn er spontaan stamtafels in verschillende etablissementen ontstaan waaruit de verhalen ontspruiten, die al dan niet opgeblazen en gekleurd in de Stamtäöfelkes beschreven worden, maar altijd een basis van waarheid hebben. Deze verhalen worden opgetekend door Frits Weerts en verschijnen wekelijks in weekkrant VIA-Weert onder de naam Stamtäöfelke. Dit is aflevering 95.

In de aanluip nao ’t book ‘Stamtafel Weert’ vergaardje vae völ fotoos van aoj kefees en de minse di-j daobeej betrokke woore. Van de kasteleins tot en met de klânte aanne tap. Beej di-j fotoos waas d’r ein woeë-op stong: ‘De kaartklup van Baks Sjaak’. Umdet di-j neet drek met ’n kefee te make haaj, hevve di-j neet int book gezatte, mer ich wil ze uch toch neet onthaoje, want ze geûftj proomptj aan wi-jtj vrêuger d’r aan tow gong. De foto zal êrreges roontelum 1950 getrokke zeen, toen d’r nog geine tillevies waas en de minse nog beej deindânger op bezeûk goonge. Al gaw haadje dan ’n kaartklupke beejein. Allewiel huuërdje allein nog mer det minse (vuurâl vröllie) gaon bridzje, en dan mojje ounog hieël stil zeen, want ângers kunne ze zich neet konsentrieëre oppe kaarte in eur hang. En d’r weûrtj allein tieë, koffie en limmenaad geschônke. Det gong vreûger waal wat ângers. Hèrtejage, huuëge, kruusjasse, toepe, klaverjasse kos neet zoonger dejje dao beej eedere slaag met de moel kommentaar op gooftj. Det gong d’r dèk haard aan tow en mette voêst oppe taofel. Völ wichter hebbe vlooke gelieërdj umdet eure pap met zien kammerui-j aanne taofel zoot te kruûsse. En druuëg kaarte zoonger pötje beer koszje uch neet indînke. Oeëti-jje gong d’n inlegk vanne kaarteri-j in ‘ne pot en koszje eine kieër per jaor potvertieëre, woeëbeej de vröllie ouch aan mochte schuûve.

Vae dachte det ‘t zoeëj kunne zeen waat heej oppe foto stieët. De potvertieër-aovendj vanne kaartklup van Aovert beej Baks-Zjaak aanne koeëj. D’r stieët ’n groeëte taart oppe taofel en woeë de vröllie zoote staon de koffietasse met vlaajschuuëtelkes en verkétjes netjes veêrig. Beej de mèn staon dikke flesse beer en al hâllef lieëg glaze. En zoeë huuëret zich ouch! Greet van Zjaak hieët de schöllek nog aan, want det most de taart sni-jje en dan koste d’r gruûmelkes op ziên soondes klédje valle. Mer det kloptj neet, want ze zeen al lânger bieëzig en aanne plefong hange slingers. De taart es ‘t naogerecht van ’n fieëst-aetentje. Kiektj oppe taofel rechs en dan zeeje det dao de deepe aetes-borde nog opgestapeldj staon. Greet waas neteurlik de koeëk. En ze kieke ammaol kontênt, dus hebbe ze good gaete. Mer welk fieëst vanne kaartklup zoeëtj gewaesj zeen? Ve wieëte-n ut neet en vae kunne ’t eur neet mieër vraoge.

Reagieëre of beûk koupe: frits.pop@ziggo.nl