Rubriek Stamtäöfelke: Drökdje oppe singels en beej ‘de Greune’

Print
Rubriek Stamtäöfelke: Drökdje oppe singels en beej ‘de Greune’

Dageliks fileleid oppe Willeminasingel Afbeelding: Gemeentearchief Weert

Laar / Weert / Altweerterheide / Stramproy / Tungelroy / Swartbroek / Ospel / Leveroy / Nederweert / Nederweert Eind / Ospeldijk -

Na uitgave van het boek ‘Stamtafel Weert’ zijn er spontaan stamtafels in verschillende etablissementen ontstaan waaruit de verhalen ontspruiten, die al dan niet opgeblazen en gekleurd in de Stamtäöfelkes beschreven worden, maar altijd een basis van waarheid hebben. Deze verhalen worden opgetekend door Frits Weerts en verschijnen wekelijks in weekkrant VIA-Weert onder de naam Stamtäöfelke. Dit is aflevering 99.

Vae gaon wi-jjer met woeë ve vuuërig stamtäöfelke zeen bliêve staeke. ’t Hieël verkieër Noeërd-Zuid in Nederland en angersterum kwoom oeëver oeës singels. D’r woore verschei-je neringdoondje di-j dao völ wil van haaje. En zieëker umdet det verkieër um de haverklap stil stong umdet de statterbrök weer ‘s oeëpe waas vör de schuute. Dus tow vör alles waat zich oeëver de wieëg begoof. Dan stoonge de aotoos vanne brök tot oppe Maasport en, met völ toeriste inne zoeemer, wul tot oppe Moeësdiêk. Aanne Bussèng vlaak beej de statterbrök haaj Haex zich ’n frietkraom gebowdj en umdet de autoos dao ammèr moste stoppe kosse de friet âmper aangehaaldj kriêge, want de sjefeurs di-j dao dageliks langs kwoome, benudje daen tiêd um effe um ’n frietje te pakke. En messchiens nog ’n krekèt vör oongerwieëges of toês. De Moês (Bèrke Bos van Juliana) dieëj gooj zake op ziên terras doeër de minse di-j eure vwatuur effe oppe Bieëkport, vuur de duuër van Neerke Schieëpers (Scheepers), nieër zatte. En d’r zich eine gînge pakke. Beej zuûvelhândel Anton Vloemans waasj altiêd volle bak met minse di-j dao ’n fleske mêllek, joggurt of sjokomèl pajje um van te lörke. En soeëmers, as toeriste met de fiets de Limburgse heuvels gînge bekieke, stong de bleîk naeve Anton ziene wînkel dék vôl met fietse van hollanders di-j dao effe ’n fleske mêlk goonge tuttere, wi-j vae det met ’n pîlkske zoeëje doon. Mer neet alle toeriste droonke mêlk. Ouch Joep vanne Wacht (Kahlert van kefee de Wacht) haaj ziên terrasje boete staon en schoonk rejaal Werthabeer in de dörstige kaele. En dan stoonge ze daonao tieëge de hegk vanne Nazaretstieëg, tieëgenoeëver de kieët van Tjeu de Bêls (aanneëmer Gijbels), zich weer lieëg te zeike, waat ze eigelik beej ‘de Greûne’ moste doon, naeve de frietkraom aanne Busseng. En ‘De Greune’ hieëget gewieëte. Ge haatj d’r trouwes mieër staon in Wieërt. Aanne stasie stong d’r eine, achter ’t stadhoês oppe Mêrrent, en op ânger plaatse.

Vae woeëndje toen aanne singel en ich stong mich det hieël gedoons dek staondjes in ’t duursgaat te bekieke. En zoeë-as di-j hollanders nao ‘t zuide trokke, goonge de Limburgers int vuurjaor nao de bolle. Kieke nao de tölpe, paosbloome en hyacinte. En asse dan saoves weer heivers kwoome haaje ze eure wage geseerdj met bloome. De motorkap en de porteere hoonge vôl met boonte slingers di-j ze langs de wieëg tösse de bollevêldje aan kräömkes koste koupe. En dan waasj net of ze langzamer rieëje, umdet ângers de slîngers kepot zoeëje wèjje. Waat woore det schoeën ti-jje, toen ve nog kontênt woore met ‘n ‘dagje Keukenhof’!

Reagieëre en book bestelle: frits.pop@ziggo.nl