Gedicht in ’t Zittesj: Tösje Biesenhof en Schwienswei

Print
Gedicht in ’t Zittesj: Tösje Biesenhof en Schwienswei

Afbeelding: Jean-Pierre Geusens

Born / Buchten / Holtum / Papenhoven / Geleen / Graetheide / Sittard / Windraak / Limbricht / Einighausen / Guttecoven / Munstergeleen / Obbicht / Grevenbicht -

Tösje Biesenhof en Schwienswei

is vanalles te belaeve,
num dat noe mer aan, dat is ‘n gegaeve,
ein hepke, drenkske, ieske,
Biesenhof haet ‘t in hoes,
en mit eine kleine sjpeeltuin
vuile kènjer zich dao thoes,
Driepoelvievesj, ein manaesj mit paerd,
en ouch de Danikerberg is heel get waerd,
ich waar de kènjerboerderie vergaete,
mit sjäöpkes, verkes, hounder, geite,
en dao höbbe ze ouch vla, mót geer weite.

Dan wiejer, de Gelaenbaek is ózze gids,
nao Brasserie Abshaove,
sfeervol, es te mer get wits!
Vervolges in de kapel, bie pater Karel,
ein kaerske laote brenne,
kiek róndj, bae effe, rös, neit renne,
en noe op Zitterd aan, zjwieg èns, wach,
dao woort taege de Gelaenbaek Keutelbaek gezag,
mer dat is allang veurbie, neitwaor,
want ‘t water is noe zuver, helder, klaor.

‘t Sjtadspark kump in zich, ich bof,
mer eesj lènks de Ophaovenerhof,
mit kènjerboerderie en kleine sjpeeltuin,
dan de Ophaovenermeule, wie sjoon,
ein groot waterraad bepaolt dao de toon,
Arthur, mit zien luuj,
sjtaon hie veur uch paraat,
óm biefsjtök te serveiere, mit frit en sjlaat,
de baek sjplits zich hie, richting Parklaan,
en richting ‘t ooste, op de Paesjtraot aan.

Me kump in ‘t park, ein rieksmonumènt,
mit vievesj en buim, in gans Zitterd bekènd,
mit ènje en zjwane, ein échte fontein,
óngeveer 18 hectaar, nae, dat park is neit klein,
num plaatsj op ein bank en kóm nog èns trök,
‘t geef emes rös, ‘t zörg veur gelök,
dan gaon veer weier wiejer
langs Ligne, bieb en Hogesjool,
wie gezag, de baek is zuver,
lang neit mee ein aope riool.

Ónger de Odasingel door,
Dr. Nolens- en Sjportcentrumlaan,
kómme veer dan bie natuur,
de natuur op de Schwienswei, aan,
mit prachtige viever, gaot g’rös mer èns kieke,
me kènt dao geneite, ech waor, dat zal blieke,
de aaftakking van de Gelaenbaek
kump hie weier trök,
en truf ziene oorsjpróng bie,
wie me zaet: de Clootsbrök.

Tösje Biesenhof en Schwienswei,
dat is ein gegaeve,
is van alles te zeen, van alles te belaeve,
wanjel, fits, pauzeier, kiek,
en geer zult zègke: ‘Phil, doe höbs geliek!’

Toegang tot alle Plus-artikelen?

Dagelijks worden meer dan 100 Plus-artikelen gepubliceerd door de verslaggevers van De Limburger. Steun de regionale journalistiek en word digitaal abonnee vanaf 1,04 per week.

Profiteer nu