Ós Modesjtaal: Waat zal ’t ós brènge?

Gein veurnummes veur ’t nuje jaor

Veurnummes, die höb ich neit, ouch gein bucket list of in goud Zittesj tob-lies of töbke-lies, z’ón lies mit dènger die emes nog gedaon wilt höbbe veurdat hae sjturf. Neit dat ich dao noe aan wil dènke… ’t Woord kump van ’t Èngelsje kick the bucket waat de piep oetgaon of sjterve beteikent. In ‘t Frans kènt me de oetdrökking casser sa pipe oftewaal ‘zien piep braeke’ voor doodgaan. Gans vruiger zag me: Hae is ripsj mit ein verwiezing nao R.I.P. Of: hae is pirre, tirre, hemele, geit nao de marode. Marode is ‘n awd woord. Mit väöl versjeije beteikenisse: krank, kepot, aafgelaef. Nao de marode gaon beteikent ouch: verlaore gaon. Oppe Merode gaon: op sjtruip- of plundertoch gaon. Euveriges, ’t haet niks mit Marotte te make! Dat haet väöl (anger) beteikenisse, bv. ‘ne narresjtek!

Van krisboum pès sjtehinge

Noe de krisbuim zeen opgeruump en de keuningskouk wied op is en de daag einen hanesjrei gelengk zeen, waere de ouge gerich op de kómmende vastelaovend. De sjtart waar in Remunj, ’t ènj is wie gewènd in Gulpe. In anger sjtae en dörper gaon ze dan ’t maske begrave. D’r zeen al gans get nuuj prinse, prinsesse, riddesj, enz. benuimp en geïnsjtalleierd. En gelökkig allenej in hun modesjtaal. Ouch ’t LVK op 3 fibberwarie is al oetverkoch. Op regionale tv- en radiozendesj bv. Radio Nónnevot en Radio Gaaas of Spotify kènt me väöl buutte en leidjes zeen en heure. Op de versjeije zittinge natuurlik ouch. Vergaet de sjtehinge neit. Waat ein woord!

Euver ’t getal elf

Elf is ‘t getal van vasteloavend, van carnaval. Dat begint op de 11de van de 11de . D’r zitte 11 luuj in de ‘Raod van elf’. En jedere 11 jaor wurt ein jubilei gevierd. Op ’t ènj van de 18de eeuw woort ’t Rijnlandj bezat door de Franzose. In daen tied woort dao al flink karneval of fastelaovend gevierd. Óm de Franse te plaoge, zelfs te sjikkaneiere zatte ze zich van de Franse aafgekeke driekentjige sjtaeke (patsje) op. In ’t Frans nuimp me ze tricorne. Ze kaoze ouch d’n elfde van d’n elfde es begin-datum ómdat de drie lettesj van de principes van de Franse Revolutie: Egalité, Liberté et Fraternité same ’t woord elf vorme! Dat sjtouk natuurlik. Ouch dat heurt bie de vastelaovend. Sjus wie ’t laammake en ’t sjlachte in Zitterd. Mer veer mótte nog aeve wachte. ’t Is pas januari. Volgende maondj mee… euver de vastelaovend.

Pès dan. Blief gezóndj. Reacties: johnhertogh@gmail.com.